Antxon Arza kirolaria eta enpresaria da, baina batez ere, abenturazalea da. Urte luzez, “Al filo de lo imposible” telebista saioan aritu zen.. Duela zenbait urte, Venezuelako Yunuarí ibaian hamabost metro behera jauzi egin zuen kayak batekin eta bi orno hautsi zituen. Horren ondorioz gurpil aulkian dabil. “Oso gogorra izan zen hasieran baina ezin duzu atzean gelditu. Zoriontsu nago berriz bizitzeko aukera izan dudalako, berriz ere familiaz, lagunez eta naturaz gozatzeko aukera dudalako”. Enpresaria ere bada Antxon Arza. Kayak eta kanoak egiten eta saltzen dituen enpresa sortu zuen aspaldi. Ordutegia ongi antolatu eta kirola egiteko tarte zabala hartzen du. “Besteak beste, eskia, igeriketa eta piraguismoa praktikatzen ditut. Ariketa fisikoak on egiten dit, energia ematen dit eta buru osasunerako lagungarria zait”.

Horretaz gain, batetik bestera ibiltzen da hitzaldiak ematen. Bere bizitzaren esperientzia ezagutzera emanez. “Nahiz eta mugak izan gauza asko egiteko gai gara. Zer ez dezaket egin baino, zer egin dezaket pentsatu behar dugu. Etxeko sofan telebistari begira geldituta ez dago aurrera egiterik”.

Podcast: Ireki leiho berrian | Jaitsi | Txertatu

Poesiaren heriotza arriskua, gaurkotzeko beharra eta berpizteko premia mintzagai ezin aproposagoak dira gure Poeta Zonbien Kluberako. Eta horiei guztiei buruz mintzatu gara klubeko kideekin, hau da, Angel Erro, Hedoi Etxarte eta Iñigo Astizekin. Abiapuntua, Astizek Berrian argitaraturiko artikulu irakurgarri hau. Idazkiaren izenburua, “Mailu bat nola gaurkotu”. Horren inspirazio iturri bistakoa, Gabriel Arestiren poema ezaguna: “Esanen dute / hau / poesia / eztela, / baina nik / esanen diet / poesia / mailu bat / dela”. Hortik gure post honen izenburua. Solasaldi mamitsutik atera dugun ondorio nagusia, Etxartek gaur, hilaren 18arekin, aurkeztuko duela Sinplistak poema liburua 20:00etan, Iruñeko La Hormiga Atomica liburu dendan, Errok eta Astizek lagunduta.

Podcast: Ireki leiho berrian | Jaitsi | Txertatu

Merkataritzako sektorearen egoeraz iritzi bilketa egin dugu Metropoli Foralean. Hiritarron kontsumo ohiturak aztertu ditugu bereziki. Azalera handiko saltokiak eta denda txikiak alderatu ditugu. Komertzio txikirik gabe gelditzen ari den hiriguneari eta saltoki handiekin betetzen ari den periferiari erreparatu diegu.

Erosten ditugun produktuen kalitateaz ere mintzatu gara. Prezioak ahaztu gabe, jakina. Bereziki neguko merkealdia hasi berria dugun garai honetan. Kontsumitzaileen eta ekoizleen arteko harremanaz ere hitz egin dugu. Bestelako ekonomia baten beharraz eta gizarte eredu solidario bati buruz mintzatu gara.

Merkataritza sektoreko eragileen parte hartzea

Gure artean izan ditugu Olaia Alonso, ELA sindikatuko kidea, Iban Iribarren Txapitela kaleko “Slide” dendako nagusia, Bixente Taberna udal arkitektoa, Mikel Altzuart EHNEko nekazaria eta David Garnatxo Landare elkarteko kudeatzailea.

Argazkia: Alberto Barandiaran

Podcast: Ireki leiho berrian | Jaitsi | Txertatu

Castillo Suarez poeta altsasuarrak liburu berria plazaratu du. Olerki bildumaren izenburua “Urtebetze festa” da. Lan honen ardatz nagusia bakardadea da. Egilearen esanetan “nahiz eta jendez inguraturik egon bakarrik gaude, hein handi batean gure bizitza bakarrik eraikitzen dugu”. Bakardadea tragediarik gabe lantzen duen liburua idatzi nahi izan duela esan digu Metropoli Forala saioan.

Ekonomia poetikoa

Bakardadeaz gain, gatazka da liburuaren beste ardatz nagusi bat. Nolanahi ere egile sakandarra ez da ari gatazka politikoaz. “Olerki hauetan gatazka dago iraganarekin, gatazka giza harremanetan eta gatazka norbere buruarekin”. “Urtebetetze festa” poesia liburuaren ezaugarri nabarmenak dira ere idazkera neurritsua eta sosegua. “Ekonomia poetikoaren aldekoa naiz ni, ez zait gustatzen luzamendutan ibiltzea eta horregatik hitz gutxitan esaten ditut gauzak”.

Polisemiaz beteriko mezu irekiak erabiltzen ditu eta ironia karga handia duten esaldi biribilak osatzen ditu Casti Suarezek. Euskalerria Irratian haren ahotik zenbait poesia entzuteko parada ere izan dugu.

Podcast: Ireki leiho berrian | Jaitsi | Txertatu

Eguneroko bizimodua, euskara eta natura dira bere betiko obsesioak. Begi aurrean ikusten duenarekin konformatzen ez den horietakoa dugu. Leitza eta Goizueta dira bere unibertsoa eta unibertsitatea. Elkarrizketa egin diogu Metropoli Foralean. Guk galderak egin eta hark galdera berriak eginez erantzun digu. Haren esanetan, oraingo gizartea zuhaitzaren hostoen antzekoa da. “Haizeak eramaten ditu hostoak, bazter guztietara zabaltzen ditu. Inor ez da ohartzen zuhaitzaren zainez. Zuhaitzari sustraiek eusten diote. Zainetara jo eta lurpean dagoena arakatzea dut gustuko. Azaletik ibili baino, nahiago dut txoko zehatz batean barrendu. Imanol, Beethoven, Amancio Prada bidelagun izan ditugu gure elkarrizketatuak hala hautatuta. Patziku Perurenak Saski bete intxaur bere azken liburuko zenbait pasarte ere irakurri dizkigu.

Argazkia: Argia

Podcast: Ireki leiho berrian | Jaitsi | Txertatu