Uxue Barkos, Metropoli Foraleko bigarren zabalgunean hazi eta hezitako iruindarra. Geroa Bai koalizioko diputatua Madrilen eta Nafarroa Bai taldeko zinegotzia Iruñeko udalean.

“Contra viento y marea” liburua plazaratu du berriki. Bularreko minbizia zeukala jakin zuenetik, urtebete geroago Espainiako Kongresura itzuli zen arteko bizipenak biltzen dira lan honetan. “Nire barruan dudan kazetariak idatzi du liburua, 2011.urteko kronika biltzen da bertan, nire eguneroko bizitza kontatu dut, minbiziarekin izaniko harremana”.

Medikuak minbizia zuela esan zionean kolpe gogorra hartu zuela aitortu digu Uxue Barkosek. “Ezin izan nion negarrari eutsi baina une horretan bertan medikuak esan zidan gaixotasun hau sendatzen dela eta terapiarik hoberena izan dira hitz horiek, buruan izan ditut etengabe”.

Hasierako hilabete gogorrak

Hasierako hilabete horiek ez ziren xamurrak izan, kimioterapiaren ondorioak latzak baitira. “Oso ahul gelditzen zara, nekaturik zaude, ilea galtzen duzu baina ingurukoen laguntzari esker aurrera ateratzen zara”, hala nabarmendu digu Geroa Baiko diputatuak.

Bularreko minbizia duten beste hainbat emakume ausart ezagutu dituela aipatu digu. “Haien indarrak eta kemenak asko lagundu dit, eredugarriak izan dira niretzat”. Duela bi urte bizitako esperientzia pertsonala ez ezik, Uxue Barkosek liburuan orduko egoera politikoa ere gogoratu nahi izan du: “Bi hauteskunde deialdi izan ziren 2011an, udalekoak eta Kongresukoak, lan gogorra egin zuten alderdikideek eta emaitza onak lortu genituen. Urte politiko oso garrantzitsua izan zen.

Podcast: Ireki leiho berrian | Jaitsi | Txertatu

Mikel Tabernak bere azken eleberria aurkeztu digu Arratsalde.on saioan: Alkasoroko benta. Susa argitaletxeak karrikaratu du Alkaiagakoaren lan berria. Fikzioa ala autobiografia ote den galdetu diogularik, erantzun digu 70eko hamarkadako gizartea eta pertsonaiak margotu nahi izan dituela koadro batean, eta horretan bere bizipen pertsonalak txertatu dituela.

Lesaka eta Bera artean dago Alkasoro. Denetik saltzen da hango bentan, eskuinean baitauka denda eta ezker aldean taberna; beraz, handik igarotzen dira biztanle guztiak, oraitxe ez bada geroago. Bentako semea da Martin Irazoki, nobela honen kontalaria, 50eko hamarkada amaieran jaioa, gaztaroko hogei urteen berri emango diguna, eta gisa horretan herri oso baten erretratua.

Liburua bihar (osteguna, hilak 21) aurkeztuko dute, ilunabarreko 20:00etan, Iruñeko  Zaldiko Maldiko Elkartean, Antsoleaga karrikan. Ekitaldia Susa argitaletxeak eta Zaldiko-Maldiko elkarteak elkarlanean antolatu dute. Tabernak liburua aurkeztuko du, Patxi Muruzabal kantariaren emanaldia ere izanen da, baita otamen txikia ere.

Podcast: Ireki leiho berrian | Jaitsi | Txertatu

Arratsaldeko lauetatik seietara, gure lan talde osoa korrika ariko da gaur, AEK-k antoltauriko euskararen aldeko lasterketa Iruñerrian dugula eta. Zuzeneko konexioak, ibilbideari buruzko xehetasunak, egitarauaren inguruko zehaztapenak, elkarrizketak, lekukotzak… Horiek guztiak eta gehiago bildu ahal izateko, bi moto izanen ditugu errepidean, zenbait kolaboratzaile antolatzaileen furgonetetan, hainbat korrikalari lasterketaren barruan, bi esatari estudioan, bi teknikari kontrol mahaian.. Nolanahi ere, gaurko saio bereziaz haratago, egunero emanen dugu Korrikaren berri Metropoli Forala eta Arratsalde.on saioetan. Atzo jada zuzeneko konexioa egin genuen Korrikaren hasierarekin. Eman euskara elkarri. Eman irratia elkarri.

Argazkia: Argia

Hainbat herritar eta kultur munduko, euskalgintzako, gizarte mugimenduetako, sindikalgintzako zein politikako hainbat ordezkarik parte hartu dute gaur Euskalerria Irratiaren aldeko elkarretaratzean. Nafarroako Gobernuari eskaera zuzena egin diote: behingoz Euskalerria Irratiari aitor diezaiola bere lana egiteko eskubidea, hau da, Iruñerrian irrati zerbitzu euskaldun, independente eta profesionala eskaintzekoa.

Ilunabarreko 20:00etan hasi da protestaldia, Nafarroako Jauregiaren aitzinean. Han ziren hainbat herritar ugari eta hainbat pertsona ezagun. Hiru komunikabide zuzendari: Martxelo Otamendi (Berria), Xabier Letona (Argia) eta Joseba Santamaria (Diario de Noticias). Bi diputatu: Sabino Cuadra (Amaiur) eta Uxue Barkos (Geroa Bai). Bi alkate. Kirio Gastearena (Atarrabia) eta Unai Lako (Agoitz). Hainbat zinegotzi, tartean, PSNko Jorge Mori. Euskaltzaindiako Andres Iñigo. Kultur munduko hainbat lagun: Aingeru Epaltza, Casti Suarez, Angel Erro… Sindikatu ia guztietako kideak. Alderdi gehienetako ordezkariak…. (beherago, zerrenda osoa). [Gehiago irakurri...]